wantok

 

PAPUA Niugini i redi na inap long holim ol Apec kibung, Dokta Allan Bollard, Ekseketiv Dairekta bilong Apec Seketariat i tok.

Dokta Bollard, husat i wok long Apec Seketariat opis long Singapore, i mekim dispela tok long taim PNG i holim namba 10 Apec Transpot Minista Miting long Pot Mosbi las wik.
Dispela kibung i namba wan kibung long planti ol arapela kibung long kamap bihain long dispela yia na 2018 bipo long bung bilong ol lida i kamap long Novemba, 2018.
Dokta Bollard i tok i gat inap ples long kisim namba bilong ol manmeri i kam na sekyuriti na ol arapela wok i orait tasol.
Em i tok i gat liklik hevi long sait bilong trefik tasol dispela i no ken mekim wanpela i tingting planti.
Inap long 19 minista i bin kamap long wiken long dispela kibung.
“Samting olsem 10,000 manmeri bai kam long Apec Lida kibung long neks yia,” Dokta Bollard i tok.
“Long dispela taim haus bilong kibung na ol arapela samting bai redi pinis.
“Wantaim dispela mausman bilong wan wan ol midia ogenaisesen bai kamap tu.
“Mipela i bilip olgeta wok bai redi bipo long bikpela kibung i kamap.”
Long kibung ol minista i bung long toktok long rot bilong strongim wok bilong transpot long graun, solwara na klaut.
Ol minista i kisim dispela taim tu long painim rot bilong sapotim moa meri i wok insait long trenspot sekta na long wankain taim i painim rot long pasim pasin nogut bilong humen trefiking.
Justin Tkatchenko, Minista bilong Lens na Fisikol Plening i makim maus bilong Praim Minista Peter O’Neill long kamap na opim kibung long Sarere 7 Oktoba.
Long welkamim ol minista, Wesley Nukundi, Minista bilong Transpot i tok em i gutpela long PNG i holim kain bung olsem.
Em i tok dispela i givim sans long PNG i soim em yet long ol arapela kantri long ol gutpela samting na strong em i gat long en long wok bilong divelopmen.
Em i tok dispela ol bung i givim sans tu long PNG long kisim helpim long ol Apec memba kantri we em i sot long en.
Ol minista i go bek long kantri bilong ol long las Sande.
Ol kibung we bai kamap bipo long bikpela Apec kibung long 12 – 18 Novemba, 2018 em:

  • 6-8 Oktoba, 2017, Apec Trenspot Minista kibung.
  • 5-6 Disemba 2017, Namba wan opisal kibung;
  • 29 Jenuari – 10 Februari, 2018, senia opisal kibung;
  • 23 Epril – 5 Me, 2018, senia opisal kibung;
  • 13 – 28 Ogas, 2018, senia opisl kibung; na