wantok

 

PAPUA NIUGNI  Sios Patnasip Program (CPP) bilong ol 7-pela bikpela sios long kantri fanding bilong Australia gavman i amamas tru long opim namba tri hap bilong dispela program long Tunde dispela wik long Pot Mosbi. Dispela program bai go long narapela tripela yia moa bihain.

Insait long wanpela seremoni long Gateway Hotel, Australia Hai Komisina, Brus Davis i bin katim ribon long ai bilong ol stekholda lida bilong ol sios na ol program wokman na meri bilong ol.
Australia Hai Komisina i tok em i amamas tru long lukim dispela CPP program i karamapim pinis 13 yia long mekim gutpela wok long PNG wantaim sapot bilong Australia gavman.  Em i tok wanpela sensus long 2011 i soim olsem ol sios long PNG i save lukautim 50 pesen o hap bilong olgeta sosel sevis long kantri. Olsem na Australia i amamas long sapotim ol sios long givim moa trening long ol wokman na wokmeri bilong ol long bringim moa sevis i go long ol pipel.  
Papua Niugini Sios Patnasip Program (PNG CPP) em i patnasip program bilong ol 7-pela bikpela sios long kantri, Katolik, Evanjelikal Luteran Sios, Anglican Sios ov PNG, Baptis Yunien ov PNG, Seven De Edventis na Salvation Army PNG wantaim ol susa sios bilong ol long Australia.
 Program i stat long yia 2004 na em i bin wokim gutpela wok namel long ol sios long kamapim gutpela kepesiti bilding o trenim ol wokman na wokmeri bilong ol sios misin insait long eria bilong wok bilong ol olsem helt, edukesen, pis bilding o kamapim bel isi, Jenda Ikwaliti divelopmen, na planti narapela wok.
Col Kelvin Alley, bilong Salvation Army PNG, husat i siaman bilong ol Sios Lidas Kaunsil bilong CPP i makim maus bilong olgeta na i tok tenkyu long Australia Hai Komisina na Australia gavman na ol pipel bilong Australia long bilip ol i gat long ol Papua Niugini Sios long putim mani long helpim ol sosel wok bilong sios long ol komyuniti.
“CPP Program em i gat kaikai bilong em i winim olgeta narapela eid program bilong Australia gavman i kam long PNG. Mi em wanpela trupela bilipman bilong CPP,” Col Alley i tok.
“Tenkyu Australia gavman long putim bilip long 7-pela bikpela sios bilong Papua Niugini. Tenkyu tu long Papua Niugini Gavman wantaim sapot bilong Dipatmen bilong Komyuniti Divelopmen, Sios, Meri na Yut long Deputi Seketeri, Marape i kam stap,” em i tok.  
PNG Sios Patnasip Program i holim wanpela CPP Foram bilong ol long Tunde na Trinde dispela wik long Gateway Hotel, Pot Mosbi.