Ol lain i bilas na danis fran long nupela klaien haus bilong Senta bilong Hop Meri Seif Haus. POTO: James G. Kila.

James G. Kila i raitim

ALEXISHAFEN Senta bi­long Hop Meri Seif Haus long Madang provins i bin opim nupela klaien haus o fasiliti bi­long en long las wik Tunde.

Dispela nupela haus em hap bilong Senta bilong Hop we ol Katolik Sister aninit long oda bilong St Therese i lukautim na menesim.

Em i ples we ol i save lukau­tim ol meri na pikinini husat ol lain i paitim o bagarapim ol.

Ol St Therese Sister i bin opim namba wan kain senta long Madang long naispela eria long Alexishafen Katolik misin stesin long Madang distrik.

Vika Jeneral bilong Madang Katolik Asdaiosis, Pater Ralp Lasawala, i mekim lotu na pre long blesim dispela nupela fasiliti.

Dairekta bilong Senta bi­long Hop Meri Seif Haus, Sis­ter Thecla Gamog i tok olsem dispela nupela klaien haus bai helpim senta long sait long spes na tu givim praivesi long ol meri husat i go long hap na i laik stap isi na kisim gutpela tingting.

Sister Thecla i tok tenkyu long ol ovasis lain long Germa­ny na tu Caritas Australia long helpim long wokim dispela nu­pela klaien haus.

Em i tok dispela klaien haus bai givim spes long ol meri hu­sat man bilong ol i paitim ol na ol i ranawe i go long seif haus.

Ol sosel sevis patna ogenais­esen olsem Madang Provinsal Sosel Sevis Dairekta, Jubilee Dulau, mausmeri bilong ol meri long Madang provinsal asembli, Margaret Anut, na tu nes long Alexishafen Helt Sen­ta i bin go long lukim ol i opim dispela klaien haus.

Ol polis opisa husat i wok wantaim ‘Family and Sexual Violence Unit’ (FSVU) i bin kamap tu.

Olgeta dispela lain i givim bikpela tok amamas long ol Sister bilong St Therese long gutpela wok long kamapim kain meri seif haus long sevim ol meri na pikinini.

PINIS.