Aiye Tambua i winim bek sia bilong Goroka Open ilektoret we em i bin kisim namba wan taim tru long 20219 bai-ileksen. Em i wok, nau bai wok bilong em tru i kirap long Goroka.

 KISIM SIA: Aiye Humae Tambua i winim sia bilong Goroka Open gen. POTO: Sape Metta.

Sape Metta i raitim

GOROKA open ilektoret long Isten Hailans bihain long namba 15 eksklusen long kaunim bilong ol vot long 2022 Nesenel Jenerel Ileksen(NJE) long kaunim senta long Nesenel Spots Institut (NSI), i lukim Aiye Humae Tambua i winim dispela sia.

Tambua i kisim 34,385 long win, bihainim em long 24,971 em Bire Kimisopa husat em wanpela olpela MP na memba bilong dispela ilektoret.

“Lukluk long namba mi kisim long ol vot bilong ol pipel bilong Goroka, ol i gat strongpela tingting long givim mi dispela namba long makim mi go long palamen na makim ol insait long 5-pela yia,” Tambua i tok.

Em i bin winim dispela sia long bai ileksen we i bin kamap long stat bilong 2019, na i go het long i stap olsem memba bilong Goroka i kam inap long dispela 2022 NGE.

Bihain long win na sainim rits long NSI long las Sarere avinun, Tambua i tok amamas long ol pipel bilong Goroka long makim em long i go bek long palamen na karimaut ol wok we em i statim insait long ilektoret bilong em.

“Mi laik tok tenkyu long ol pipel bilong Goroka long makim mi gen long kamap olsem lida na memba bilong ol.

“Na mi save olsem mi gat bikpela wok long mekim, wanpela long ol em long ol infrastraksa divelopmen projek.

“Yumi mas mekim long senisim na bringim Goroka taun i go antap, na sidaun long narapela level we yupela ol pipel bilong mi bai ken amamas na sidaun gut long en.

“Helt, edukesen, lo na oda, stretim ol rot na bris na ol arapela bikpela gavman sevis em bai go pas long ol wok bai opis bilong mi i mekim.

“Taim yumi kisim gutpela helt sevis, skul na edukesen, sindaun gut aninit long lukaut bilong lo na oda, yumi ken lukim senis i kamap long taun bilong yumi,” Mista Tambua i tok.

Em i tok, “Nau em i taim bilong olgeta pipel bilong Goroka i mas kisim dispela tingting bilong wok wantaim, maski sapos ol i no putim mak long givim vot long mi.

“Yumi olgeta i mas wanbel na kisim gutpela tingting long wok wantaim na kisim ol sevis i kam, na bringim tu divelopmen i go insait long distrik bilong yumi.”

Mista Tambua i tok ol plen em i stap pinis long bildim gut na stretim ol sevis long Goroka taun, tasol dispela em bai kamap sapos ol pipel i wanbel na wok wantaim em, na ol opisa bilong em na Goroka Distrik Divelopmen Atoriti (GDDA) long mekim dispela ol plen i kamap.

Em i namba wan kendidet husat i go pas long kisim deklaresen long ol arapela 7-pela open ilektoret bilong Kainantu, Henganofi, Ungai/Bena, Okapa, Lufa, Obura/Wonenara na Daulo, wantaim wanpela rijinel sia bilong Isten Hailans provin.

Iliminesen proses bilong ol i wok long go het nau, na bipo long dispela wik i pinis, moa deklaresen bai kamap.