Polis Komisina, David Manning i singaut long ol pipel bilong Papua Niugini long wokbung na kamapim gut dispela ileksen.
WOK WANTAIM PIPEL: Komisina Manning i singaut long ol piple i mas wokbung wantaim ol opisal na sekyuriti fos long lukim ileksen i kamap gut. POTO: RPNGC.
OL wok bilong 2022 nesenel jeneral ileksen i wok long kamap nau long kantri na Polis Komisina, David Manning i singaut long ol pipel bilong Papua Niugini long wokbung na kamapim gut dispela ileksen.
Em i tok i gat kain kain nius i kamap long olgeta kona bilong kantri. Long sampela ples ol wok bilong ileksen i ran gut na long Hela na Enga, i gat ol hevi i bin kamap.
Mista Manning i tokim ol memba bilong sekyuriti fos olsem nau em i taim bilong testim wok bilong ol.
“Yumi no ken givap. Em i wok bilong yumi long lukautim dispela ileksen. Yumi gat planti ol sevisman na meri husat i bilip long kantri na i mekim wok bilong ol olsem ol trupela pipel bilong Papua Niugini.
Bai yumi strongim wok bilong stretim ol hevi i kamap long ileksen. Yumi trastim wanpela narapela na givim sapot na strongim bilip bilong yumi long Papa God.”
Em i tok Praim Minista James Marape i winim sia bilong Tari-Pori. Ol i kaunim yet ol vot bilong Hela. Ekting PPC Hela-CIP Robin Bore i ripot olsem i no gat hevi long taim ol i kaunim vot long Hela.
- PPC Sauten HailansProvins, Sif Inspekta Daniel Yangen i tok provins bilong em i redi long vot nau.
- PPC WHP, Suprintenden John Sagom, i tok ol skeyuriti fos i redi long taim ol pipel i vot long 13 Julai. Bai i gat moa sekyuriti opisa i muv i go long ol 334 ples bilong vot.
- PPC Simbu, Suprintenden David Warap, i tok provins bilong em i redi long vot. Ol i gat ol QRF yunit, wanpela Mobail Skwat na wanpela PNGDF platun i sambai na wetim taim bilong vot long Fraide 15 Julai. Em i tok i gat inap opisa long mekim ol wok we 200 bai i go long wan wan distrik long taim bilong vot.
- Boda Komand, Asisten Komisina Peter Philips, i amamas long sekyuriti wok redi long komand bilong em.
- PP Saut na Not Fly, Sip Inspekta Silva Sika i tok ol pipel blong Westen Provins i stat vot long las wik Tunde na wok i ran gut. I no gat ripot bilong vailens long ol 4-pela ilektoret (Saut, Not, Delta na Midel Fly). Em i tok sampela ples i pinis long vot tasol sampela i wetim balus long kisim ol i go bek bikos ren i bagarapim ples.
- PPC Wes Sepik, Sif Inspekta Joe Poema, i tok ol pipel i vot gut tasol ren i mekim na wok i no pinis. Taim nogut long kain ples olsemTelefomin i stopim balus long kisim ol wokman i go long hap. Ol pipel long Aitape bai pinis vot nau.
- PPC Nu Ailan, Felix Nebanat, i tok Namatanai i pinis long vot na ol i lokim ol ballot boks redi long kaunim. Ol pipel bilong Kavieng Open i no vot long Sarere bikos Musau Ailan em i wanpela SDA komyuniti. Ol i vot long Sande na olgeta wok bilong kisim vot bai pinis nau.
- PPC Manus, Sif Inspekta Kiweri Kesambi, i tok ol pipel i stat vot long 6 Julai. Ol i wetim nius bilong Aua na Wuvulu LLG bikos i no gat telepon risepsen. Ol i wetim Nevi Sip, Ted Diro, long bringim ol balot boks bilong dispel tupela LLG. Bai ol i stat long kaunim ol vot long dispel wik Trinde o Fonde.
- Ol pipel bilong Is Nu Briten bai pinis vot long dispel wik na bai ol i kaunim ol vot. I no gat ripot bilong wanpela hevi i kamap. Long hap bilong Pomio, ol tim bilong kisim vot i bin wokabaut longwe long mekim wok bilong ol na sampela opisa i sik na sua i kamap long lek. Ol i salim ripot long balus i go kisim wanpela sekyuriti opisa husat i no inap long wokabaut.
- Long Wes Nu Briten, i no gat nois long taim ol pipel i vot. Long Talasea Wod 1. ol sapota bilong wanpela kendidet i laik yusim nem bilong ol lain i dai pinis na vot tasol ol polis i stopim ol.