PNG i wok long lukim kain kain hevi i kamap long infomesen ol manmeri na pikinini i wok long putim long intenet long ol pletfom bilong sosel midia.
I gat ol lain nogut i save putim was na ol i ken yusim infomesen long bagarapim man, meri o pikinini. Olsem na tingting gut long taim yu postim ol piksa o toktok long sosel midia bikos i gat man i was is tap long kisim dispela infomesen na yusim egensim yu long bihain taim. Dipatmen bilong Infomesen na Komyunikesen Teknoloji i luksave long ol dispela hevi na long dispela wik em i putim tok save bilong Sosel Midia SaibaSekyuritu. Ol i putim sampela isi tok save we ol pipel i ken ritim na bihainim.
I gat moa long 3.48 bilien manmeri i save yusim sosel midia long wol. Dispela em i samting olsem 45 pesen bilong populesen bilong wol. Ol lain husat i save yusim intanet i save spendim 2.5 aua long wan wan de long salim toktok i go kam long ol sosel netwok.
Hia em sampela samting yu ken putim was long en:
- I no gat “Delete Button” long intanet. Sapos yu laik serim infomesen, orait skelim gut tingting pastaim, bikos maski yu presim ‘delete’ sampela lain bai lukim dispela infomesen o piksa yu rausim.
- Apdeitim privacy na security setting sapos yu laik serim infomesen. Rausim geotagging we ol narapela manmeri i ken lukim na save yu stap we.
- Konek tasol wantaim ol lain yu trastim.
- No ken putim ol praivet infomesen bilong yu na famili bilong yu bikos ol lain nogut i ken stilim na yusim egensim yu. Rausim ol lokesen sevis we ol manmeri i ken lukim we yu stap.
- Opim maus na tokaut sapos yu kisim wanpela posting yu no laikim o yu salim wanpela krangki posting i go long narapela man o meri.
- Ripot hariap long ol polis sapos wanpela man o meri i yusim sosel midia long pretim yu o mekim ol tok nogut o bagarapim nem bilong yu.