POLIS Komisina na COVID-19 Nesenel Pandemik Kontrola David Manning i givim aut 12 nupela mesa aninit long Nesenel Pandemik Ekt 2020 long Fonde las wik.
Ol dispela 12 nupela mesa i slekim ol tambu we i stap long 6-pela wik long daunim pandemik.
Manning i tok bikpela senis em long Mesa Namba 9 we i toktok long ol bisnis na sosel mesa. Em i slekim dispela mesa long larim ol bikpela sios insait long kantri i op gen na ol pipel i ken go lotu olsem komyuniti.
Em i tok stat long Me 13 namba bilong ol pipel husat i ken bung long ol haus lotu em 100 na ol i mas bihainim yet pasin bilong sosel distens o stap longwe (1.5 mita) long narapela.
Bihainim dispela ol nupela mesa olgeta bisnis, ples bilong amamas, ol maket, ol stua, skul na ol ples bilong lotu i mas bihainim ol gaidlain bilong nupela pasin long dispela taim pandemik i stap yet.
Nau;
- i gat tambu i stap pinis long moa long 10 pipel i ken bung;
- ol nait klab na ol ples bilong salim strongpela dring i mas pas;
- ol haus kaikai i ken op gen tasol olgeta pipel husat i go insait o go ausait i mas bihainim lo bilong wasim han wantaim sop o han senitaisa na bihainim olgeta haijin standet olsem kontrola i givim;
- ol ples bilong pilai hos bai i pas inap Me 20 na taim ol i op gen bihain long dispela de ol i mas bihainim stret ol mesa bilong abrusim COVID-19 we kontrola i givim pinis long operetim sevis bilong ol;
- bihainim ol mesa i stap antap olgeta arapela ples we i save operetim ol ektiviti bilong pilai laki i ken op sapos ol i ken bihainim ol seifti gaidlain bilong COVID-19 we kontrola i givim pinis long operetim dispela ol sevis;
- nogat wanpela ples we i save salim bia o ol arapela strongpela dring long tekawe i ken salim bia long Fraide, Sarere na Sande. Ol haus kaikai tasol i ken salim strongpela dring bihainim laisens bilong ol;
- no gat ol klab, ol spots bilong malolo o kompetisen i ken kamap. Ol pilai bilong malolo i ken kamap tasol i mas gat 4-pela pipel tasol i pilai long wanpela taim. Tasol ol lain i ken kisim tok orait long kontrola long kamapim ol pilai;
- ol skul, edukesen institusen maket, na stua i mas bihainim sosel distens rikwaimen bilong 1.5 mita namel long ol wan wan man, meri o pikinini na seif haijin prektis. Taim ol i go insait o go ausait ol i mas wasim han wantaim sop o han senitaisa;
- Ol lotu i ken go het long operet tasol ol i mas bihainim stret ol tambu na tu i mas gat 100 pipel tasol i bung long wanpela taim long wanpela ektiviti na olgeta i mas bihainim ol COVID-19 protokol;
- Ol haus krai i ken i gat 100 pipel tasol i bung
Dispela ol mesa i sanap nau stat long Me 13, 2021 na bai i stap inap taim kontrola i mekim senis o i diklerim pinis bilong pandemik aninit long Nesenel Pandemik Ekt 2020.