NESENEL na Suprim Kot Jas, Jastis David Cannings i givim 10-pela de oda pinis long Madang Distrik Divelopmen Atoriti (DDA) na Madang provinsal gavman long yusim mani long stretim Madang taun rot we i bagarap tru.
Wok i mas stat long Epril 1 na pinis pastaim long Ogas 1, 2021.
Jastis Cannings i bin samonim o givim kot oda long ol lida bilong Madang olsem Gavana Peter Yama, Madang MP na Jastis Minista, Bryan Kramer na ol arapela pati husat i stap long Madang taun na yusim rot long sanap long kot long las wik antap long tokaut long wanem samting i mekim ol i no yusim pawa bilong ol na mani gavman i givim long fiksim Madang taun rot.
Jastis Cannings i putim ol dispela oda long niuspepa tu we ol pablik i ken ritim na klia long disisen bilong em.
Jastis Cannings insait long oda bilong em i tok olsem wanem ol bagarap nau i stap long Madang taun rot i kamap bikos Madang gavman i no putim inap mani long fiksim rot. Na dispela i min olsem ol rait bilong ol pipel long yusim taun rot i givim hevi long ol.
- Long namba wan oda Jastis Cannings i givim em i tok olsem Madang Divelopmen Atoriti (DDA) em bilong stretim na mekim wok mentenens long Madang taun rot stat long Baidal Rot i go olgeta long Madang sip bris. Na siaman bilong Madang DDA em MP Bryan Kramer i mas redim ol sek mani mak olsem 7.182 milien na K3.8 milien long statim wok long Epril 1 na wok i mas pinis pastaim long Ogas 1, 2021.
- Namba tu oda em siaman bilong Madang DDA i mas tokaut bihain long wanpela affidavit o stetmen long wanem rot tru em i yusim long kamapim wok.
- Namba tri oda em Madang provinsal gavman em Gavana Peter Yama i siaman long en i mas putim K2.5 milien aninit long 2021 baset o mani plen bilong en long wokim ol rot mentenens stat long Baidal Rot i go long Madang Eapot na tu ol arapela strit rot insait long Madang taun eria.
- Namba foa oda em long Madang Provinsal Edministreta long wok klostu wantaim Provinsal Woks Menesa long lukim wok i kamap gut long gutpela standet na wok i mas stat pastaim long Februeri 10 na rot i mas orait long yusim long Me 1, 2021.
- Kot Oda namba faiv em Nesenel Gavman (Stet) i mas givim K2.5milien long stretim rot i go olsem long Beon CS (Haus Kalabus) na wok i mas stat long Me 1, 2021 na pinis long Disemba 1. Insait long dispela kot oda em Dipatmen ov Treseri na Dipatmen ov Woks bai givim stetmen o affidavit bihain long wanem rot ol i yusim long karimaut wok we kot i odaim ol long mekim.
- Namba siks Kot Oda i tokim Madang EbenTaun Atoriti (MULLG) long redim na yusim ol wok lain na ol masin bilong en long helpim na karimaut ol wok mentenens.
- Kot Oda namba seven i tok olsem wanpela komiti ol i kolim Madang Taun Rot Kot Komiti bai i mas bung wanpela taim insait long tupela mun long lukluk o monita na toktok long wanem ol wok i kamap bihain Kot Oda.
Ol arapela Oda i sut long edministresen bilong Kot oda na wanem samting i mas kamap long sekim olsem wok mentenens long rot i go orait bihainim Kot Oda we Jastis Cannings i putim long en.
James G. Kila i raitim