MAK olsem 107 man i kisim tok orait long lusim ol haus kalabus insait long kantri long yia 2020. Bipo dispela namba i no save kamap olsem. Liklik namba tasol i save kisim tok orait long go aut.

Long Trinde 23 Desemba sampela man  long haus kalabus i bin kisim tok orait long lusim haus kalabus.

Long dispela nupela Minista bilong Jastis Brian Kramer na Sekreteri bilong Depatmen bilong Jastis na Atoni Jeneral Dokta Erik Kwa i bin stap tu.

Dokta Kwa i tok, “154 man i askim long kisim tok orait long lusim haus kalabus tasol 107 man tasol i bai kam out.”

“Bipo taim ol i save givim tok orait long 50 man na go daun tasol nau bikpela namba tru i kisim tok orait,” Dokta Kwa i tok.

Em i namba wan taim long dispela kain namba i lusim Haus Kalabus. Dr Kwa i tok moa, “Dispela i kamap bikos mipela i bung 8-pela taim long dispela yia.” Pastime ol lain long jastis i save bung 4-pela taim long wanpela yia.

Minista  Kramer i tok 6-pela meri i kisim tok orait long lusim haus kalabus na 111 ol man i lusim haus kalabus.Ol i lusim liklik meri na planti man i go aut bikos nogat planti meri i stap insait long haus kalabus. Namba bilong ol man insait long haus kalabus em bikpela tru.

Dokta Kwa i tok yumi no inap long larim ol kalabus man i kam aut nating. Ol i mas askim na bihainim ol wok bilong rausim ol yet insait long kalabus.

“Sapos ol kalabus man i no askim bai mipela i no inap lusim ol kam aut. Long askim long kam aut ol kalabus man i mas wet long taim ol inap long ol i inap long askim,” Dokta Kwa i tok.

UPNG Journalism Sumatin Samantha Solomon i raitim