SASPEK long dai bilong Jenelyn Kennedy, Bhosip Kaiwi i go kamap namba wan taim long Waigani Komital Kot long Tunde moning na Mejistret Tracy Ganaii i tokaut long sas bilong en.

Bhosip Kaiwi i kisim sas bilong Wilful Murder o kilim man o pikinini wantaim tingting bilong kilim ol olgeta na Unlawful Murder o kilim manmeri o pikinini na i no pret o kea long ol, aninit long seksen 229 (1) bilong PNG Kriminol Kod. Kaiwi i kisim gutpela tingting long dispela sas ol i ritim long en.

Mejistret  Tracy Ganaii i givim waren bilong kalabusim na polis bai putim Kaiwi long Bomana Koreksenel Sevis na pinisim kot keis bilong en.  Tasol loya bilong Kaiwi i askim kot long larim Kaiwi i stap long Boroko Polis sel na i no ken salim em i go long Bomana bikos i em i tok i gat planti toktok i kamap long dispela keis na laip bilong Kaiwi i stap long mak no gut.

Tasol Mejistret Ganaii i bekim tok bilong loya bilong Kaiwi olsem, “Taim man i kisim sas pinis, em mas i go long Bomana. Tasol sapos yu tingting planti long sefti bilong Bhosip, orait yu ken toktok wantaim ol polis na Koreksenel sevis na stretim dispela long hap.”

Loya bilong Kaiwi i askim kot tu long givim oda long ol manmeri long stopim pasin bilong salim ripot bilong dispela keis i go i kam long midia na long sosel midia. Em i tok ol dispela pasin pablik i mekim i wok long bagarapim wokpainimaut bilong ol.

Tasol Mejistret Ganaii i tokim em stret olsem kot i no gat kontrol long sosel midia o menstrim midia long givim oda long ol. Tasol, em i tok, sapos sampela lain i pilim no gut long sampela ripot we i kam long midia, orait, i gat sampela rot long stretim dispela.

Dispela keis i nau surik i go long July 30^th 2020 na long dispela taim Polis Prosekyuta bai givim ripot bilong wokpainimaut we i kamap long dispela keis.