wantok

 

MINISTA bilong Imaigresen na Boda Sekyuriti, Petrus Thomas na Bruce Davis, Australia Hai Komisina long PNG i bung wantaim long makim graun long mekim wanpela haus sik long boda ples long Westen Provins.

Dispela wok bilong makim graun i kamap long Mande long dispela wik long Mabudawan  Helt Senta long Saut Flai Distrik.
Tupela man i tok kamap bilong dispela haus sik i bikpela samting long wanem em bai givim sevis long planti manmeri na bai helpim long daunim sik bilong Tubekulosis (TB) na malti drag resisten TB (MDR-TB) long bus bilong Saut Flai na ol arapela hap we sevis i no go long em yet.
Dispela haus sik we ol bai mekim long Nesenel Helt Standet, bai gat sola pawa wantaim bekap jenereta na bai gat wara saplai bilong em yet.
Dispela haus sik bai gat 16-pela bed wantaim imejensi dipatmen, haus karim na klinik bilong ol pikinini, TB klinik, X-ray na lebratori sevis, ples mama wetim long karim, wod bilong ol wasmama i stap long lukautim nupela mama, ples bilong wasim klos, haus kuk, haus bilong jenereta i stap na ples bilong kukim pipia.
Dispela ol nupela haus na ol masin em ol bai givim aninit long Rurel Praimeri Helt Sevis Deliveri Projek (RPHSDP), em Australia Gavman-Esian Divelopmen Benk i givim mani long en.
RPHSDP nau yet i wok long kamapim 23 Komyuniti Helt Pos long PNG.
Wokabaut bilong PNG-Australia tim i go long Mabudawan i givim sans long bung wantaim ol memba long Australia-PNG Torres Strait Triti ples.