wantok

 

OL sumatin bilong Gret 12 long St. Joseph Intenesenel Skul long Pot Mosbi i bin go long Pot Mosbi Strit Pikinini skul long Boroko long mun Septemba na givim ol kaikai na ol toi bilong pilai.

St Joseph Intenesenel Skul i save mekim dispela kain wok marimari wantiam ol pikinini bilong Strit Pikinini Program planti taim. Strit Pikinini Program em i program we Kadinel AsBisop John Ribat i bin statim na em i stap strong yet baksait long dispela program. Em i bin statim wantaim sampela ol liklik pikinini husat i no go long skul na i save painim spes bilong ol kar long kapak bilong daun taun Pot Mosbi sampela yia i go pinis.
Em i bin statim long yia 2010 wantaim sampela bois na wanpela gel bihain. Tasol nau i 100 pikinini we ol Sisters of Wisdom na Sisters ov St. Joseph ov Cluny long Boroko i save lukautim long de, tupela de long wik. Ol i save givim kaikai na givim skul long ol long 8 klok i go inap 12 klok long Fonde na Fraide olgeta wik.
Kadinel John Sir Ribat i tok insait long 2015 i kam, dispela program nau i gat 12-pela skul olsem long gret 10, na gret 12 na sampela i kisim wok pinis.  Tasol em i tok planti i wok long go bek gen long strit na lusim skul bikos papa na mama i no helpim ol long givim bas fe na kaikai long ol i ken go yet long skul.
Em i tok narapela samting em ol bisnis haus bilong ol Saina i save salim ol liklik samting long ol long salim gen long strit.
Em i tok ol nau yet dispela program i nidim ol bisnis haus na ol komyuniti long helpim ol.
“Ol dispela pikinini i nidim yumi long hlepim ol.  Wanem kain liklik helpim yu husat i ken givim em inap tasol. Yu ken go long ol senta bilong strit pikinini ministri long givim helpim. Yumi mas stap long helpim wanpela narapela,” Kadinal John Sir Ribat i tok.