wantok

 

YUNAITET Nesen i tokaut long dispela wik olsem ol i painim ol yangpela lida long strongim Sastenabel Divelopmen Gol (SDG) program dispela en.

UN i tok ol dispela lain i mas ol strongpela lida husat i mekim wok bilong stopim ol pipel i stap olsem ol tarangu, klaimet senis na kamapim pasin bilong ol pipel i mas gat wankain rait.  
 UN Seketeri-Jeneral bilong ol Yut, Jayathma Wickramanayake i go pas long dispela program. Dispela program ol i kolim Young Leaders Initiative i luksave long 17 yangpela lida olgeta yia husat i mekim ol wok bilong winim ol mak bilong Sastenabel Divelopmen Gol bipo long yia 2030.  
Mis Wickramanayake i tokaut long dispela samting long bung bilong One Young World samit long Bogota wantaim namba wan klas bilong ol Yangpela Lida bilong ol  SDG. 
Dispela program bilong ol Yangpela Lida i lukluk long ol yangpela pipel em krismas bilong ol i stap namel long 18 na 30 long ol kantri long wol husat i mekim ol wok bilong kamapim gutpela aindaun long graun long bihain taim.
Ol dispela 17 Yangpela Lida bai wok wantaim UN Yut Envoy long wok bilong ol yut long Sastenabel Divelopmen Gol, toktok long ol wok bilong ol na kontribut ol aidia long wok bilong UN long bungim ol yangpela pipel wantaim.
 “Ol yangpela pipel bilong tude em i no ol lida bilong tumora – yumi em ol lida bilong tude”, Mis. Wickramanayake i tok.
Tude long wol, i gat moa long 1.8 bilien pipel krismas bilong ol i stap namel long 10 na 24 yia na ol i bikpela populesen bilong ol yut long histori. UN i tok namba bilong ol bai i gro we: namel long 2015 na 2030 tasol bai i gat 1.9 bilien yangpela pipel long wol em krismas bilong ol i 15 yia.
“Olsem na long winim dispela bikpela mak bilong ol SDG, yumi mas kisim ol yangpela pipel husat i save long ol dispela Gol na i wari olsem ol dispela SDG i mas karim kaikai,” UN Envoy long ol Yut i tok.
UN i bin tokaut long namba wan lain ol Yut Lida  long Septemba 2016 bipo long 2016 UN Jeneral Asembli miting. I gat moa tok save bilong dispela program i stap long dispela adres: www.sdgyoungleaders.org/meet-the-young-leaders