wantok

 

OL bikpela mani oganaisesen i askim Papua Niugini long promotim rot em i save mekim na menesim mani long wol.

Ol oganaisesen i mekim dispela singaut long Bisnis Edventis PNG invesmen konfrerens we i kamap long Australia i no longtaim i go pinis.
Ol i tok taim PNG i mekim olsem ol arapela kantri na moa yet ol mani oganasisesen bai save long mani sistem bilong em.
Ol i tok sapos dispela mani sistem bilong em i gutpela o nogat, dispela i no ken mekim PNG i tingting planti. Dispela long wanem ol i ken tokim PNG stret long gutpela rot bilong menesim gut mani sistem bilong em.
Ol i tok taim PNG i mekim olsem dispela bai helpim em.
Ol i tok dispela tu bai helpim ol oganaisesen na ol investa long ol i gat bilip long PNG na kam insait long wok bisnis.
Ol i tok wanpela rot bilong groim ikonomi bilong kantri em long mekim bikpela gavman bon.
Rekot bilong Kina Sekyuritis i soim PNG Tresari Bil long wanpela yia i save mekim moa long 8 pesen, dispela em olsem 1.76 pesen long Australia na 1.35 pesen long Yunaitet Stet ov Amerika (USA).
“Oganaisesen bilong Gavman bon oksen long dispela taim i kamap long rot we nogat wanpela man o oganaisesen long wol i save,” Erik Krammer, Sif Ekseketiv bilong PacWelt Kapital i tok.
“Sapos PNG i putim long ples klia olsem long intanet, olgeta lain long wol bai save. PNG i olsem liklik ailan kantri na nogat planti manmeri i tingting long sekim o laik save long em.”
Krammer i tok PNG i gat planti gutpela samting tasol sapos em i no promotim na soim ol samting em i gat na wok bilong em i mekim long ples klia, nogat wanpela investa bai save na laik kam long em.