wantok

 

BISIATABU Praimeri Skul insait long Sentral Provins antap long het bilong Sogeri maunten, nau i kisim wanpela nupela laibreri we Digicel PNG Faundesen i fandim long mani mak bilong K165,000.

Dispela laibreri bilding i gat olgeta hap bilong sola lait, i gat pom bilong sindaun, ol buk self, ol laibreri buk, sia bilong laibrerien long sindaun, des na sia bilong kompiuta na des bilong laibrerien. Dispela em i olsem presen i kam long Digicel Foundesen long skul husat i soim gutpela gavanens na komyuniti onasip o we komyuniti i papa long skul na lukautim gut mani na infrastraksa bilong en.  
Bihain long namba wan invesmen bilong Digicel PNG Faundesen wantaim wanpela dabol klasrum long 2014, Bisiatabu Skul na Komyuniti bilong ol Seven De Edventis Edukesen Ejensi i wokim wanpela haus tisa na klostu ol i pinisim narapela dabol klasrum gen long kisim moa sumatin i go long skul.
“Ol bikpela samting mipela i lukluk long kisim mak long ol projek bilong mipela long kisim presen em sapos komyuniti i kamap papa long ol infrastraksa, i gat gutpela gavamens, na i gat moa pikinini i go long skul. Em i gutpela tru long lukim ol komyuniti i givim han long senisim na mekim skul i gro. Bisiatabu  i kamapim dispela senis insait long tupela yia wantaim helpim bilong ol komyuniti stat long ol mama i digim nupela toilet i go long ol papa i katim bus long sanapim nupela klasrum,”CEO bilong Faundesen, Beatrice Mahuru i tok.
 Ol klasrum we ol i save holim ol klas em bipo i bin stap olsem kea senta bilong ol Australia soldia long Wol Woa 2. 
“Bisiatabu Praimeri skul em namba wan skul we Seven De Edventis sios i bin kirapim long Papua Niugini. Ol klasrum i lapun tru na mipela i wok long traim senisim ol tasol olgeta plen i save nidim fainens na mipela i tenkyu long Digicel Faundesen long ol dabol klasrum mipela i kisim long 2014 na nau nupela laibreri. God i salim yupela i kam long bekim ol prea askim bilong mipela ol sumatin, tisa, bod na komyuniti,” Het Tisa Roger Zega i tok wantaim ai wara.
Wankain toktok tu i bin kam long man husat i makim komyuniti , Bagua Watti husat i tok, ol sumatin nau i laki long gat gutpela infrastraksa olsem, narakain long taim em yet i bin stap sumatin bipo. Em i givim salens long ol sumatin na ol skul komyuniti long mas tok tenkyu na lukautim gut ol fasiliti bilong narapela tumbuna lain bihain i ken yusim tu.