wantok

 

NESENEL Fiseris Kolis (NFC) em wanpela longtaim bik skul i save givim trening long lukautim pis long kantri.

Gavman i gat plen long apim mak bilong ikonomi long kantri na fiseris em i wanpela rot inap bringim gutpela mani long kantri.
Long greduesen bilong ol sumatin long NFC las wik, Prinsipal bilong skul, Jeff Kinch i tok olsem:
“Mipela i gohet long mekim gut ol program na ples bilong skul long givim gutpela trening long ol sumatin bai helpim kantri long lukautim pis, long wan wan man i go long grup na bikpela ol kampani.
“Long narapela yia, kolis bai i gat ples bilong wok pis wankain olsem ol bikpela tin pis kampani i gat long en insait long kolis bai ol sumatin i lainim long wok pis,” Mista Kinch i tok.
“ Mipela i laik gat bik nem long givim skul bilong lukautim pis na mipela i no ken pret long traim long kamap long dispela mak.
“ Dispela tok i go long olgeta opisa husat i kisim pepa long mekim senis long wan wan opis bilong yupela long provins.
“ Yupela bai kamapim senis long helpim ikonomi long sait bilong lukautim pis.
“ Mipela i kam 40 yia pinis, nau em i taim bilong senis na kamap bikpela long fiseris sekta. Mista Kinch i tok olsem PNG i
stap daunbilo uru long lata bilong ikonomik divelopmen long wol.
“ Mipela i mas mekim wok long sait bilong mipela long fiseris na helpim long bringim kantri i kam antap.
“ Mipela olgeta mas putim han wantaim long wanem wei mipela inap long helpim ikonomi na kantri bilong mipela,” em i tok.