wantok

 

DISPELA YWAM Trening na Medikol Sip, MV YWAM PNG, i lusim Australia na ran i kam kamap long Pot Mosbi long Tunde dispela wik long statim wok bilong en gen long bringim helt sevis i go long ol rurel eria bilong Papua Niugini.

MV YWAM PNG i bin go stap long Townsville na Cairns long tripela mun we ol i bin mekim ol mentenens wok na ol arapela wok long en. Ol i wokim wanpela ples bilong miting na trening rum na wokim moa ples bilong slip long 116 bet i go antap long 130 bet.
Menesing Dairekta bilong YWAM Medikol Sip, Ken Mulligan, i tok em i amamas long lukim MV YWAM PNG i statim gen ol wok bilong en.
“Ol dispela wok ol i pinisim nau long dispela sip long las tupela mun bai i strongim ol wok bilong mipela long go long planti handet viles i stap long ol longwe hap.
“Mipela i wok klostu wantaim ol divelopmen praioriti  bilong Gavman bilong PNG. Ol tim bilong mipela bai wok wantaim PNG Nesenel Dipatmen bilong Helt, ol Provinsal Helt Atoriti na ol local helt woka, long kamapim gutpela wok wantaim.
“I bin gat planti pipel husat i opim han na givim helpim long mipela long winim dispela mak. Mipela i gat bikpela amamas long lewa bilong mipela long taim MV YWAM PNG i wok long ran i kam bek nau long nambis bilong PNG,” Mista Mulligan i tok.
MV YWAM PNG wantaim ol 130 volantia bai i wok long ol komyuniti i stap long ol longwe ples long Sauten rijon na long Morobe Provins long 7-pela mun i kam bihain wantaim nesenel na provinsal helt atoriti. 
 Sampela wok ol bai mekim long ol dispela ples em long givim banis sut bilong ol pikinini, sekap long ol bel mama, sekap long ol tit, sekap long ai bilong ol pipel, wokim helt promosen, testim ol pipel long sik TB, na givim in-sevis trening long ol lokal helt woka.
Petron bilong YWAM Medikol Sip long PNG, Sir Rabbie Namaliu, i tok em i wet tasol long tok welkam long taim MV YWAM PNG i kam bek long ples bilong en.
“Mi save amamas long lukim MV YWAM PNG i winim ol wok bilong en we planti pipel tu i bin wok wantaim long lukim dispela driman i karim kaikai.
“Dispela raun bilong YWAM Medikol Sip em i stori bilong wanpela gutpela samting i kamap long PNG. Mi wet tasol long harim ol stori bilong ol laip ol i bin helpim, long ol mun i kam bihain,” Sir Rabbie i tok.
Bihain long em i stap wanpela wik long Pot Mosbi, bai MV YWAM PNG i statim namba wan wok bilong en long Oro Provins long dispela wiken.
 
Stat long 2010 i kam inap nau, YWAM Medikol Sip i givim 911,000 heltkea na trening sevis na givim helt kea i go long moa long 176,000 sikman na meri long planti handet viles long ol ples longwe, long mak bilong K86 milien Kina.

Kepsen: KMV YWAM PNG i ran i kam bek long PNG bihain long em i bin go long draidok long Townsville na Cairns long sampela mentenens wok.