wantok

 

PAPUA Niugini Kakao Bod i lonsim nupela kampani bilong ol fama i no longtaim i go pinis long Kokopo, Is Nu Briten.

Boto Gaupu, Sif Ekseketiv Opisa bilong PNG Kakao Koporesen i tokaut long dispela long Bisnis Advetis PNG bisnis konfrerens long Sidni, Australia long las mun.
Gaupu i tok as tingting bilong kamapim kampani em long helpim liklik ol kakao fama long ol i no lukluk tasol long kisim helpim long kakao bilong ol tasol i kisim helpim tu long ranim liklik bisnis bilong ol.
Em i tok bikpela as tingting i bilong lukim kakao indastri i kamapim bikpela namba bilong kakao wantaim gutpela kwaliti na salim i go long ovasis maket.
Em i tok koporesen long neks 5-pela yia i hop long lukim moa long 20,000 fama i seaholda long dispela kampani.
Long stat, koperesen bai stat tasol long Is Nu Briten provins we em i laik lukim ol rurel fama i baim sea na i kamap memba bilong kampani.
Bihain long dispela ol fama bilong ol arapela provins i ken kamap memba bilong kampani.
“Kampani bai lukluk long kamapim ol wok we i mekim ol fama i lusim tingting long wok olsem kakao fama tasol i go moa long kamap komasel (bisnis) kakao fama,” Gaupu i tok.
“Ol i tingting long mekim gut mani long kakao na tingting long strongim famili bilong ol long bihaini taim.
“Tasol no gat gutpela piksa i stap bilong soim ol long wok ol i mas mekim.”
Gaupu i tok bikos long dispela planti fama i save lus long han bilong ol koporetiv sosaiti.
Em i tok nupela bisnis bai kamapim strongpela sistem bilong gavanens na menesmen, teknoloji, refomim trening sistem na ekstensen wok na kamapim kwaliti kakao bin.
Em i tok long dispela tingitng kampani i kisim helpim long i2i Divelopmen Ltd, wanpela papagraun kampani bilong Australia.