wantok

 

NESENEL Fiseris Kolis (NFC) long Nu Ailan provins i wok strong long skruim save bilong lukautim pis long helpim ikonomi bilong kantri i kamap bikpela na strong.

Ol  fiseris opisa long wan wan provins i go long NFC na stap insait long wan mun trening long tupela nupela setifiket  program.
Long greduesen de bilong ol sumatin bilong tupela program las wik Fraide, 11 sumatin i kisim pepa long Fiseris Opisa long menesmen na 15 i kisim pepa long Akuakalsa.
Ol sumatin bilong menesmen o fiseris opisa i kisim namba foa pepa bilong ol (tripela ol i wokim longtaim) na sumatin bilong akuakalsa i kisim namba tri pepa, tupela ol i mekim long taim.
Akaukalsa em skul bilong digim wara hul bilong yu yet na lukautim pis long en na Fiseris Opisa o menesmen program em save didiman o fama i mas gat long lukautim pis gut.
Deputi Menesing Dairekta bilong Nesenel Fiseris Atoriti (NFA), Philip Polo i tok: “Mi amamas olsem mipela inap long givim gutpela trening long ol fiseris opisa.
“Em i nupela samting mipela wokim na mipela i mas wok hat long divelopim pasin bilong lukautim pis long hol wara (akuakalsa) long PNG.
“Taim mipela i mekim planti, bai mipela salim i go long narapela kantri long mekim gutpela mani long stretim sindaun.
“ Em bai longtaim tumas long mipela kamapim tru dispela wok, tasol em i gutpela olsem mipela i statim dispela wok nau,” em i tok.
Dispela ol opisa em ol namba wan grup long kisim kain trening long kantri.
Ol bai go bek long wan wan provins bilong ol na givim skul long ol pipela long komyuniti long lukautim pis wankain olsem ol i save lukautim kakaruk.
Bihain ol bai go het long kisim moa skul na mekim diploma program o kos ol i kisim setifiket pepa long en.
NFC em namba wan han i save wok aninit long lukaut bilong NFA.