wantok

 

NESENEL Fiseris Kolis (NFC) wok lain long ples bilong wokim fiseris stadi long Nango Ailan, Nu Ailan i karim aut wanpela bung stadi long bislama (si kukamba) wantaim ol wan wok long ol Pasifik Ailan kantri.

I gat 20 kain si kukamba o bislama long solwara bilong PNG.
Dispela bung stadi i lukluk long wanpela kain si kukamba tasol, em sendfis.
Meri husat i save lukautim dispela wok, Esther Leini i tok: “Mipela i wokim stadi na lukautim sendfis bikos ol i save stap  klostu long nambis, ples wara i no daun na isi long ol pipel i kisim long kaikai o salim.
“ Olsem na  namba bilong ol i go daun tru long solwara bilong PNG,” Mis Leini i tok.
Long dispela stadi wok, ol i save kisim ol bikpela sendfis long ol gras bilong solwara i stap sait long nambis na kisim i go long ples bilong lukautim long Nango Risets Fasiliti.
“ Em i hat tumas long luksave long si kukamba man na meri.
“Olsem na mi save mekim kain kain wei olsem apim hot bilong wara na givim planti kaikai moa long ol bai helpim ol rausim kiau,” Mis Leini i tok.
Ol i save kisim ol kiau na putim long tenk bai pikinini i kamap.
Dispela ol pikinini ol i save lukautim ol long stadi senta na ol narapela komyuniti ol i wok bung long en.
Bihain long tripela mun, sendfis i mas gat 3-pela kilo hevi bilong bodi bai ol i penim na i go lusim bek long solwara.
Mis Leini i tok olsem ol i penim long ol i ken raun i go sekim ol gen bai isi long luksave long ol dispela ol i go putim bek long solwara.
Mis Leini i tok olsem ol i save rausim klostu 1,000 sendfis i go bek long solwara olgeta taim.
Dispela wok i kamap gut tru.
Long stat bilong yia, wanpela komyuniti i rausim klostu 5,000 pikinini sendfis i go long solwara.
Bihainim dispela wok, Sekreteriet bilong Pasifik Komyuniti (SPC) i sponsa long bung stadi bilong sendfis namel ol Pasifik kantri.
Tupela woklain bilong lukautim Bislama long Fiji na tupela long Vanuatu i kam long Ailan na i stadi long dispela wok.
Long dispela program, ol lain stap insait bai skelim save na tingting bilong mekim dispela wok.
Bihain bai ol woklain bilong PNG i go long ol narapela Pasifik kantri long lainim we ol i save lukautim ol bislama.