wantok

 

PNG (PAPUA Niugini) Air i lukluk long statim gen sevis i go long Losuia, Milen Be Provins bihain long ol i stretim ples balus na haus pasindia.

Ples balus na haus pasindia i bin bagarap taim ol manmeri i no amamas long mak bilong ileksen i kamap.
Tasol bihain long dispela Milen Be Provinsal Gavman i stretim ples balus na haus pasindia na long 24 Septemba kampani i traim mekim wanpela ran.
Bihain long dispela traim ran, kampani i tok em i wok long toktok wantaim olgeta stekholda olsem papagraun, sekyuriti bilong ples balus na Milen Be Provinsal Gavman long ol i stretim olgeta samting bipo long kampani i tok orait long mekim ol komesel ran.
“Mipela i bilip i no gat hevi long ples balus na i no gat asua long sefti we ol opisa bilong balus, ol pasindia na balus yet i kisim bagarap,” Paul Abbot, PNG Air Sif Komasel Opisa i tok.
“Tasol mipela i laikim sapot na toktok i strongim tingting bilong mipela olsem no gat wanpela birua samting bai kamap.”
Abbot i tok long Julai, klostu hevi inap kamap we balus na ol manmeri i stap long balus i kisim bagarap tasol ol i abrusim.
Em i tok em i askim provinsal gavman long stretim haus pasindia long kamap long gutpela mak.
“Wantaim wok bung namel long provinsal atoriti na ol lokal memba, mipela i hop ran bilong ol balus bai go bek long Losuia long liklik taim,” Abbot i tok.