wantok

 

SAMTING olsem 15 bikpela paia i wok log kukim bikpela hap tru bilong Kalifonia, USA long Sarere. Na samting olsem 3,000 paia paita i wok long pait strong long stopim paia i kalap i go moa yet.

Hat bilong paia na san wantaim i mekim dispela wok i no isi. Ol i ting bai i gat moa paia i kamap yet long dispela taim bilong bikpela san.Bikpela paia long saut-is Oroville, klostu long Bangor, i bin stat long Fraide apinun. Long Sarere, paia i bin kukim 10-pela haus na kukim bikpela eria samting olsem 2,000 eka. Foapela pipel i bin kisim bagarap long dispela paia na gavman i tokim ol pipel long lusim haus bilong ol na muv i go long ol ples we i seif na ol i pasim tu sampela bikpela rot long dispela eria.
“Dispela paia i wok long strong yet,” ripot bilong Kalifonia Dipatmen ov Forestri na Paia Proteksen i tok. “Dispela paia i stap long not-is na saut-is.”
“Bai ples i hat na drai yet long dispela eria we paia i kamap,” Cal Fire i tok.
Samting olsem 1,000 pipel i wok long traim stopim ol dispela paia wantaim 61 paia trak na 7-pela helikopta na ol ea tenka. Ol Red Cross disasta tim i opim ples we ol dispela pipel husat i lusim haus bilong ol i ken stap long Oroville Nazarene Sios.
“Ol volantia i sambai long givim ples bilong slip, kaikai, wara, na ol arapela samting ol famili i nidim,” American Red Cross Gold Country Region i ripot long Twitter.
Long  dispela yia tu, ol pipel bilong Butte County i bin kisim taim bikos long mun Februeri oI 188,000 pipel i bin kisim ripot olsem ol i mas lusim ples bikos ol i pret Oroville Dam bai bruk. Na long Sarere ol gavman opisa i tokim ol pipel long harim tok bilong gavman na i no ken harim ol tokwin.
Ol i no inap long stopim bikpela paia na long Sarere narapela liklik paia gen i kamap long Yuba County 6 mail longwe long Olivehurst.
Paia long west, i bin stat long saut long Beale Air Force Base, na i muv i go hariap na karamapim seven o nain eka na bihain ol paia paita i stopim.
Ol i bin helpim tupela pipel long ranawe long taim paia i kamap klostu tru long haus bilong ol, Mary Eldridge bilong Kalifonia Paia Dipatmen i tok. Em i tok ol helikopta i karim wara long bikpela raun wara klostu long haus long kilim indai paia na sevim haus bilong ol.
I no longtaim bihain long dispela ripot, narapela paia i kamap na kukim 20 eka klostu long Rescue long El Dorado County. Long Axel, ripot i tok paia i kamap klostu long Axel Court na Barrister Court.
Ren i no bin pundaun long Kalifonia inap 5-pela yia nau, na ol i ting ren bilong winta i kamapim nupela gras na dispela bai kamapim moa paia. Planti diwai i drai tu na bai isi long paia.
Gavman i tok tu olsem wok bilong ol paia paita i bungim bikpela salens long ol dron i no gat laisens long flai raun long dispela eria na kisim ol poto. Ol i pret ol dispela dron bai bam wantaim ol helikopta na balus bilong karim wara i go kilim dai paia.
Prais bilong ol dron i go daun nau olsem na moa pipel i wok long baim ol. Sampela lain i wok long salim ol dron i go kisim video piksa bilong paia olsem na gavman i pret long ol i kamapim eksiden wantaim ol balus na helikopta i wok long kilim indai paia.